នៅ Majura នៃ ដែនដីរដ្ឋធានីអូស្ត្រាលី [Australian Capital Territory]
ថ្ងៃពុធ ទី 10 ខែមិថុនា ឆ្នាំ 2026 ម៉ោង 10:30 ព្រឹក
តើ AusAlert ជាអ្វី?
AusAlert គឺជាប្រព័ន្ធព្រមានថ្នាក់ជាតិមួយដែលប្រើបច្ចេកវិទ្យាចុងក្រោយបំផុត ដើម្បីផ្ញើសារគ្រោះអាសន្នទៅកាន់ឧបករណ៍ចល័តនានាដែលត្រូវគ្នាដូចជាទូរសព្ទដៃ ថេប្លេត និងនាឡិកាឆ្លាតវៃ។
វាជាមធ្យោបាយមួយដែលលឿន និងអាចទុកចិត្តបាន ដើម្បីជួយឱ្យអ្នកទទួលបានព័ត៌មាន និងត្រៀមខ្លួនឱ្យកាន់តែប្រសើរឡើងក្នុងអំឡុងពេលមានគ្រោះអាសន្នក្នុងមូលដ្ឋាន និងក្នុងប្រទេស ដូចជា៖
- ភ្លើងឆេះព្រៃ
- ទឹកជំនន់
- ព្យុះស៊ីក្លូន
- រលកយក្សស៊ូណាមិ
- ព្យុះ ឬព្រឹត្តិការណ៍អាកាសធាតុធ្ងន់ធ្ងរ
- គ្រោះអាសន្នសុខភាពសាធារណៈ
- ការគំរាមកំហែងផ្សេងៗផ្នែកសន្តិសុខ
- ឧប្បត្តិហេតុសុវត្ថិភាពជីវសាស្រ្ត។
ប្រសិនបើអ្នករស់នៅក្នុងប្រទេសអូស្ត្រាលី ឬអ្នកកំពុងមកលេងពីប្រទេសមួយផ្សេងទៀត អ្នកអាចនឹងទទួលបាន AusAlert ប្រសិនបើមានគ្រោះអាសន្ន ឬគ្រោះមហន្តរាយនៅក្នុងតំបន់ដែលអ្នកស្ថិតនៅ។
ឧបករណ៍ចល័តដែលត្រូវគ្នាអាចទទួលបាន AusAlerts ទោះបីជាគ្មានស៊ីមកាតអូស្ត្រាលី ឬ eSIM ក៏ដោយ។
ឧបករណ៍ចល័តដែលត្រូវគ្នារួមមាន iPhones 11 និងកំណែខ្ពស់ជាងនេះ ដែលដំណើរការដោយ iOS 26.4 ឬកំណែថ្មីជាងនេះ និងទូរសព្ទ ហើយនិងថេប្លេត ដែលដំណើរការដោយ Android 12 ឬកំណែថ្មីជាងនេះ។
អ្នកអាចទុកចិត្តលើ AusAlert បាន
AusAlert ត្រូវបានបង្កើតឡើងដោយរដ្ឋាភិបាលអូស្ត្រាលី ហើយមានសុវត្ថិភាព និងគ្មានគ្រោះថ្នាក់។
AusAlert:
- នឹងមិនស្នើសុំព័ត៌មានលម្អិតផ្ទាល់ខ្លួន ឬហិរញ្ញវត្ថុរបស់អ្នក
- មិនស្គាល់ ឬរក្សាទុកព័ត៌មានផ្ទាល់ខ្លួនរបស់អ្នក
- មិនស្គាល់ ឬរក្សាទុកលេខទូរសព្ទរបស់អ្នក
- មិនតាមដានទីតាំងរបស់អ្នក
- មិនតម្រូវឱ្យអ្នកចុះឈ្មោះដើម្បីបើកចូលទេ។
ការទទួលបាន AusAlert
សារ AusAlert នឹងផ្ញើមកអ្នកជាភាសាអង់គ្លេស។ ប្រសិនបើអ្នកមកលេងប្រទេសអូស្ត្រាលីពីប្រទេសមួយផ្សេងទៀត ឬប្រសិនបើភាសាអង់គ្លេសមិនមែនជាភាសាដំបូងរបស់អ្នកទេ វាអាចមានការលំបាកក្នុងការអាន និងយល់ AusAlert។
អាស្រ័យលើឧបករណ៍ចល័តរបស់អ្នក អ្នកប្រហែលជាអាចបកប្រែសារ AusAlert ទៅជាភាសារបស់អ្នកដោយ៖
ចុចលើ Alert
ចម្លងអត្ថបទ
ទម្លាក់វាទៅក្នុងកម្មវិធី ឬគេហទំព័រដែលបកប្រែដោយស្វ័យប្រវត្តិ ទៅជាភាសាដែលអ្នកបានជ្រើសរើស។
AusAlerts មានព័ត៌មានគ្រោះអាសន្នបន្ទាន់សំខាន់ៗ។
វានឹងដាក់បញ្ចូល៖
- ប្រភេទនៃគ្រោះអាសន្ន
- តើវាកើតឡើងនៅឯណា
- តើវាមានសភាពធ្ងន់ធ្ងរប៉ុណ្ណាដែរ
- តើវាត្រូវការការឆ្លើយតបអ្វីខ្លះ
- កន្លែងដែលអាចរកបានព័ត៌មានបន្ថែម។
ប្រសិនបើអ្នកទទួលបាន AusAlert អ្នកគួរតែអាន និងធ្វើតាមការណែនាំ ដើម្បីរក្សាសុវត្ថិភាពខ្លួនអ្នក និងអ្នកដទៃ។
AusAlerts មានពីរប្រភេទ។
ការជូនដំណឹងគ្រោះអាសន្នធ្ងន់ធ្ងរបំផុត៖
- ត្រូវបានប្រើក្នុងគ្រាអាសន្នធ្ងន់ធ្ងរបំផុត។
- ធ្វើឱ្យឧបករណ៍ចល័តរបស់អ្នកញ័រ និងបន្លឺសំឡេងខ្លាំងដូចស៊ីរ៉ែនប្រហែល 10 វិនាទី
- ត្រូវបានបញ្ជូន ទោះបីជាឧបករណ៍របស់អ្នកបើកដំណើរការដោយ ‘silent’ ['ស្ងាត់'] ឬ ‘do not disturb’ ['កុំរំខាន'] ក៏ដោយ
- មិនអាចបិទនៅក្នុងការកំណត់ឧបករណ៍ចល័តរបស់អ្នក។
ការជូនដំណឹងជាអាទិភាព៖
- ត្រូវបានប្រើសម្រាប់គ្រោះអាសន្នដែលការគំរាមកំហែងមានកម្រិតកើនឡើងពីព្រោះតែស្ថានការណ៍កំពុងផ្លាស់ប្តូរ
- អាចធ្វើឱ្យឧបករណ៍ចល័តរបស់អ្នកញ័រ និងបន្លឺសំឡេងខ្លាំងដូចស៊ីរ៉ែនប្រហែល 10 វិនាទី ប៉ុន្តែវាអាស្រ័យលើការកំណត់មុខងារឧបករណ៍របស់អ្នក
- មិនត្រូវបានបញ្ជូនមកទេ ប្រសិនបើឧបករណ៍របស់អ្នកបើកដំណើរការដោយ ‘silent’ ['ស្ងាត់'] ឬ ‘do not disturb’ ['កុំរំខាន']
- អាចត្រូវបានបិទនៅក្នុងការកំណត់មុខងារឧបករណ៍ចល័តរបស់អ្នក។
ការបើកបរ និងការជិះ
ប្រសិនបើអ្នកទទួលបាន AusAlert ខណៈពេលកំពុងបើកបរ ឬជិះ សូមរក្សាភាពស្ងប់ស្ងាត់ ហើយកុំលើកទូរសព្ទរបស់អ្នក ពីព្រោះការធ្វើដូច្នេះខុសច្បាប់។ សំឡេងជូនដំណឹងនឹងឈប់បន្ទាប់ពីបន្លឺសំឡេងប្រហែល 10 វិនាទី។ នៅពេលដែលអ្នកអាចធ្វើទៅបាន សូមស្វែងរកកន្លែងមានសុវត្ថិភាព និងស្របច្បាប់ដើម្បីឈប់ និងអានសារនោះ។
ជំនួយក្នុងការអាន AusAlert
ប្រសិនបើអ្នកត្រូវការជំនួយដើម្បីយល់ពីសារ AusAlert៖
- ស្នើសុំសមាជិកគ្រួសារ មិត្តភ័ក្តិ ឬនរណាម្នាក់ដែលអាចយល់ភាសាអង់គ្លេសដើម្បីអានជូនអ្នក
- មើលបណ្តាញទំនាក់ទំនងគ្រោះអាសន្នផ្សេងទៀត ដូចជាទូរទស្សន៍ក្នុងតំបន់ ឬក្នុងប្រទេស ឬវិទ្យុ កម្មវិធីផ្សេងៗ (apps) ឬគេហទំព័រនានា
ប្រសិនបើអ្នកត្រូវការជំនួយបន្ថែមជាភាសាផ្សេងក្រៅពីភាសាអង់គ្លេស ធនធាននានានៅលើទំព័រនេះ និងផ្នែកភាសានៃគេហទំព័រអាចជួយបាន។
ត្រៀមខ្លួនសម្រាប់ AusAlert
ក្នុងអំឡុងខែមិថុនា និងខែកក្កដា ឆ្នាំ 2026, AusAlert កំពុងត្រូវបានធ្វើតេស្តនៅទូទាំងប្រទេសអូស្ត្រាលី។
នេះមានន័យថាអ្នក ឬនរណាម្នាក់ដែលអ្នកស្គាល់ អាចទទួលបានការធ្វើតេស្ត AusAlert។
ការជូនដំណឹងអំពីការធ្វើតេស្ត AusAlert នឹងត្រូវបានសរសេរជាភាសាអង់គ្លេស។ វានឹងរូបរាងដូចនេះ។
ដូច្នេះអ្នកអាចមើលឃើញច្បាស់នូវអ្វីដែលការជូនដំណឹងតេស្ត AusAlert និយាយជាភាសាខ្មែរ ហើយយើងបានបកប្រែវាសម្រាប់អ្នកនៅទីនេះ។
| CRITICAL AUSALERT | ការជូនដំណឹងគ្រោះអាសន្នធ្ងន់ធ្ងរបំផុត AUSALERT |
| TEST MESSAGE – AUSALERT | ធ្វើតេស្តផ្ញើសារ - AUSALERT |
| This is a TEST of AusAlert, Australia’s new emergency warning system. | នេះជាការធ្វើតេស្តនៃ AusAlert ដែលជាប្រព័ន្ធប្រកាសអាសន្នថ្មីរបស់ប្រទេសអូស្ត្រាលី។ |
| NO ACTION IS REQUIRED. | មិនតម្រូវឱ្យចាត់វិធានការអ្វីទេ។ |
| In an actual emergency, follow the instructions in the alert to keep yourself and others safe. | នៅក្នុងគ្រោះអាសន្នពិតប្រាកដ សូមធ្វើតាមការណែនាំនៅក្នុងការជូនដំណឹង ដើម្បីរក្សាសុវត្ថិភាពខ្លួនអ្នក និងអ្នកដទៃ។ |
| Visit www.ausalert.gov.au for more information. | សូមចូលទៅកាន់គេហទំព័រ www.ausalert.gov.au សម្រាប់ព័ត៌មានបន្ថែម។ |
| This message is authorised by the Australian Government. | សារនេះត្រូវបានអនុញ្ញាតដោយរដ្ឋាភិបាលអូស្ត្រាលី។ |
AusAlert ស្តាប់ទៅមានលក្ខណៈដូចនេះ។
0.00
0.00
ក្នុងអំឡុងពេលធ្វើតេស្ត AusAlert៖
- សារអាចលេចឡើងនៅលើអេក្រង់របស់អ្នក។
- ឧបករណ៍របស់អ្នកអាចញ័រ
- អ្នកអាចឮសំឡេងដាស់តឿនខ្លាំងប្រហែល 10 វិនាទី
- អ្នកមិនចាំបាច់ធ្វើអ្វីទេ។
ការធ្វើតេស្តក្នុងសហគមន៍
នៅខែមិថុនា ឆ្នាំ 2026 អ្នកអាចទទួលបានការជូនដំណឹងជាផ្នែកមួយនៃការធ្វើតេស្ត AusAlert ក្នុងសហគមន៍៖
នៅ Launceston នៃរដ្ឋTasmania [រដ្ឋថាសម៉ានៀ]
ថ្ងៃចន្ទ ទី 15 ខែមិថុនា ឆ្នាំ 2026 ម៉ោង 11:00 ព្រឹក
នៅ Coastal townships (Cooya Beach, Newell and Wonga Beach) នៃរដ្ឋឃ្វីនឡែន [Queensland ]
ថ្ងៃអង្គារ ទី 16 ខែមិថុនា ឆ្នាំ 2026 ម៉ោង 2:00 រសៀល
នៅ Liverpool នៃរដ្ឋញូសៅវែល [New South Wales]
ថ្ងៃពុធ ទី 17 ខែមិថុនា ឆ្នាំ 2026 ម៉ោង 4:00 រសៀល
នៅ Tennant Creek នៃដែនដីអូស្ត្រាលីខាងជើង [Northern Territory]
ថ្ងៃព្រហស្បតិ៍ ទី 18 ខែមិថុនា ឆ្នាំ 2026 ម៉ោង 10:00 ព្រឹក
នៅ Geelong នៃរដ្ឋវិចថូរៀ [Victoria]
ថ្ងៃព្រហស្បតិ៍ ទី 18 ខែមិថុនា ឆ្នាំ 2026 ម៉ោង 2:00 រសៀល
នៅ Goomalling នៃរដ្ឋអូស្រ្តាលីខាងលិច [Western Australia]
ថ្ងៃសុក្រ ទី 19 ខែមិថុនា ឆ្នាំ 2026 ម៉ោង 12:00 រសៀល
នៃ Port Lincoln នៃរដ្ឋអូស្រ្តាលីខាងត្បូង [South Australia]
ថ្ងៃសៅរ៍ ទី 20 ខែមិថុនា ឆ្នាំ 2026 ម៉ោង 11:00 រសៀល
នៅ Queanbeyan រដ្ឋញូវសៅវែល / ព្រំប្រទល់ដែនដីរដ្ឋធានីអូស្រ្តាលី [New South Wales/Australian Capital Territory]
ថ្ងៃអាទិត្យ ទី 21 ខែមិថុនា ឆ្នាំ 2026 ម៉ោង 2:00 រសៀល
ការធ្វើតេស្តថ្នាក់ជាតិ
ការធ្វើតេស្តថ្នាក់ជាតិនៃ AusAlert នឹងធ្វើឡើងនៅ ថ្ងៃចន្ទ ទី 27 ខែកក្កដា ឆ្នាំ 2026។ ក្នុងអំឡុងពេលធ្វើតេស្ត រាល់ឧបករណ៍ចល័តដែលត្រូវគ្នានៅក្នុងប្រទេសអូស្ត្រាលី នឹងទទួលបានការជូនដំណឹងនៅពេលតែមួយ។
ការត្រៀមសម្រាប់ការធ្វើតេស្ត
ប្រសិនបើការទទួលសារពីការធ្វើតេស្ត AusAlert អាចរំខានអ្នក ឬធ្វើឱ្យអ្នក ឬមនុស្សជាទីស្រឡាញ់មានអារម្មណ៍គ្មានសុវត្ថិភាព សូមបិទឧបករណ៍ចល័តរបស់អ្នក ឬបើកដំណើរការវាទៅ aeroplane mode (ការជិះយន្តហោះ) មុនពេលម៉ោងធ្វើតេស្តសាកល្បងនៅក្នុងទីតាំងរបស់អ្នក ហើយរក្សាកុំបើកដំណើរការវិញយ៉ាងតិចមួយម៉ោង។