AusAlert: Testing in June and July 2026
တၢ်ဂီၤကွံးကွးတခါအံၤရှဲပၠး၀ဲဒၣ်တၢ်လၢ AusAlert မ့ၢ်တၢ်မနုၤလဲၣ်ဒီးဘၣ်ကွၢ်လၢ်တၢ်မနုၤဖဲတၢ်မၤကွၢ် အဆၢကတီၢ်လၢအမ့ၢ်ဖဲယူၤဒီးယူၤလံ 2026 နံၣ်လဲၣ်န့ၣ်လီၤ.
တၢ်လၢအီးတၢ်ဟ့ၣ်ပလီၢ် (AusAlert) မ့ၢ်တၢ်မနုၤလဲၣ်.
AusAlert မ့ၢ်ထံကီၢ်တၢ်ဟ့ၣ်ပလီၢ်အသနူလၢအသူ၀ဲစဲးဖီကဟၣ်လၢခံကတၢၢ်လၢတၢ်ကဆှၢန့ၢ်ဂ့ၢ်ဂီၢ်အူတၢ်ကစီၣ်တဖၣ်လၢအဘၣ်လိၥ်ဖိးဒ့၀ဲဒၣ်ဒီးပီးလီတဖၣ်လၢအမ့ၢ်တၢ်ဒ်သိးလီတဲစိစိၥ်စုတဖၣ်,ထဲးဘလဲးတဖၣ်ဒီးစမးနၣ်ရံၣ်(နၣ်ရံၣ်ချုးစိၤ)တဖၣ်န့ၣ်လီၤ.
မ့ၢ်ကျိၤကွၥ်လၢအချ့ဒီးတၢ်နၥ်အီၤသ့လၢကမၤစၢၤပၥ်ပှၤလၢပကသ့ၣ်ညါတၢ်ဂ့ၢ်ဒီးအိၣ်ကတဲၥ်ကတီၤသးဂ့ၤဒိၣ်ဖဲအိၣ်လၢလီၢ်က၀ီၤဒီးထံကီၢ်ဂ့ၢ်ဂီၢ်အူဒ်သိး-
- ပှၢ်မ့ၣ်အူအီၣ်တဖၣ်
- ထံဒိၣ်တဖၣ်
- ကလံၤမုၢ်လီၤတဖၣ်
- စူၣ်နၣ်မံၣ်တဖၣ်
- ကလံၤမုၢ်လီၤဒိၣ်ဒိၣ်မ့တမ့ၢ်မူခိၣ်ကလံၤသီၣ်ဂီၤအတၢ်မၤသးတဖၣ်
- ကမျၢၢ်ဆူၣ်ချ့အဂ့ၢ်ဂီၢ်အူတဖၣ်
- တၢ်ဘံၣ်တၢ်ဘၢအတၢ်လီၤပျံၤတဖၣ်
- တၢ်မူအတၢ်ဘံၣ်တၢ်ဘၢအတၢ်ကဲထီၣ်အသးတဖၣ်အပူၤန့ၣ်လီၤ.
ဖဲနမ့ၢ်အိၣ်ဆိးလၢအီးစတြ့လယါအပူၤမ့တမ့ၢ်ဟဲဟးဖဲအံၤလၢထံကီၢ်အဂၤတဘ့ၣ်န့ၣ်, နကဒိးန့ၢ်ဘၣ် AusAlert ဖဲဂ့ၢ်ဂီၢ်အူတၢ်အိၣ်သးတခါမ့တမ့ၢ်တၢ်တတၢးတနါတခါမ့ၢ်အိၣ်လၢနလီၢ်က၀ီၤလၢနအိၣ်အီၤအပူၤအခါန့ၣ်လီၤ.
AusAlert န့ၣ်တၢ်မၤန့ၢ်အီၤခီဖျိပီးလီလၢအဘၣ်လိၥ်ဖိးဒ့တခါဖဲနအီးစတြ့လယါအလီတဲစိအ SIM အကးမ့တမ့ၢ် eSIM မ့ၢ်တအိၣ်အခါဒၣ်လဲၥ်န့ၣ်လီၤ.
ပီးလီလၢအဘၣ်လိၥ်ဖိးဒ့တဖၣ်မ့ၢ်၀ဲ iPhones 11 ဒီးအပူၤအိၣ်ဒီး iOS 26.4 မ့တမ့ၢ်သီန့ၢ်တၢ်အံၤ ဒီး Android အလီတဲစိတဖၣ်ဒီးထဲးဘလဲးတဖၣ်လၢအပူၤအိၣ်ဒီး Android 12 မ့တမ့ၢ်အသီန့ၢ်တၢ်အံၤတဖၣ်န့ၣ်လီၤ.
နနၥ်၀ဲဒၣ် AusAlert သ့လီၤ
AusAlert န့ၣ်ဘၣ်တၢ်မၤကဲထီၣ်အီၤခီဖျိအီးစတြ့လယါအပဒိၣ်ဒီးပူၤဖျဲး၀ဲဒၣ်ဒီးဘံၣ်ဘၢ၀ဲန့ၣ်လီၤ.
AusAlert-
- ပတသံကွၢ်နၤဒီးနနီၢ်တဂၤမ့တမ့ၢ်နကျိၣ်စ့အဂ့ၢ်အကျိၤဘၣ်
- တသ့ၣ်ညါမ့တမ့ၢ်ပၥ်ကီၤဃၥ်နနီၢ်တဂၤအတၢ်ဂ့ၢ်တၢ်ကျိၤဘၣ်
- တသ့ၣ်ညါမ့တမ့ၢ်ပၥ်ကီၤဃၥ်နလီတဲစိအနီၢ်ဂံၢ်ဘၣ်
- တလူၤကွၢ်စူၣ်နအိၣ်တၢ်အလီၢ်အကျဲဘၣ်
- တလိၣ်ဘၣ်လၢနကဆဲးလီၤနမံၤဘၣ်.
တၢ်ဒိးန့ၢ် AusAlert တခါ
AusAlert အတၢ်ကစီၣ်တဖၣ်ကဟဲ၀ဲဒၣ်လၢအဲကလံးအကျိၥ်လီၤ. ဖဲနမ့ၢ်အိၣ်ဟဲဟးဆူအီးစတြ့လယါလၢထံကီၢ်အဂၤတဘ့ၣ်, မ့တမ့ၢ်အဲကလံးတမ့ၢ်နကျိၥ်အခီၣ်ထံးတကျိၥ်န့ၣ်, ကကီ၀ဲဒၣ်လၢတၢ်ကဖးဒီးနၢ်ပၢၢ်၀ဲဒၣ် AusAlert န့ၣ်လီၤ.
ဒိးသန့ၤထီၣ်လၢနလီတဲစိအပီးလီတခါအဖီခိၣ်, ဘၣ်တဘၣ်နကျိးထံ AusAlert အတၢ်ကစီၣ်ဆူနကစၢ်အကျိၥ်ကသ့ခီဖျိ-
၁. ဆီၣ်လီၤလၢတၢ်ဟ့ၣ်ပလီၢ်အဖီခိၣ်
၂. ကွဲးဒိန့ၢ်လံၥ်တၢ်ကစီၣ်လၢတၢ်ဆှၢန့ၢ်နၤ
၃. ထၢနုၥ်လီၤဆူအဲး(ဖ)မ့တမ့ၢ်ပှၥ်ယဲၤသန့လၢအကျိးထံဒၣ်အတၢ်လၢကျိၥ်လၢနဃုထၢတခါအပူၤတက့ၢ်.
AusAlert အိၣ်ဒီးဂ့ၢ်ဂီၢ်အူအတၢ်ဂ့ၢ်တၢ်ကျိၤလၢအကါဒိၣ်န့ၣ်လီၤ.
အကပၣ်ဃုၥ်-
ဂ့ၢ်ဂီၢ်အူအကလုၥ်
ကဲထီၣ်အလီၢ်
အနးထဲလဲၣ်
တၢ်လိၣ်ဘၣ်တၢ်ခီဆၢဒ်လဲၣ်တကလုၥ်လဲၣ်
တၢ်ထံၣ်န့ၢ်တၢ်ဂ့ၢ်တၢ်ကျိၤဆူညါကသ့လၢတၢ်လီၢ်ဖဲလဲၣ်.
ဖဲနမ့ၢ်ဒိးန့ၢ်ဘၣ် AusAlert အခါ, နကြၢးဖးဒီးလူၤပိၥ်တၢ်နဲၣ်လီၤလၢကပၥ်နၤဒီးပှၤအဂၤပူၤပူၤဖျဲးဖျဲးန့ၣ်လီၤ.
AusAlert အိၣ်ခံကလုၥ်လီၤ.
တၢ်ဟ့ၣ်ပလီၢ်အကါဒိၣ်တဖၣ်-
န့ၣ်တၢ်သူအီၤလၢဂ့ၢ်ဂီၢ်အူတၢ်အိၣ်သးအနးအကျံၤဒိၣ်ကတၢၢ်တဖၣ်အဂီၢ်လီၤ
မၤတရုၤနပီးလီဒီးမၤသီၣ်တၢ်ကလုၢ်သီၣ်ဒိၣ်ဒိၣ်တခါလၢအယံၥ် ၁၀ စဲးကီးန့ၣ်လီၤ
အကဆှၢဃီၤအသးဖဲနပီးလီန့ၣ်မ့ၢ်အိၣ်လၢ တၢ်ဘှ့ၣ်တၢ်ဘှီၣ်မ့တမ့ၢ် တဘၣ်မၤတံၥ်တၥ်ယၤတဂ့ၤ အတၢ်ဆီလီၤဃၥ် အပူၤဒၣ်လဲၥ်န့ၣ်လီၤรบกวน’ ก็ตาม
တၢ်ကးတံၢ်ဃၥ်အီၤလၢနပီးလီအတၢ်ဆီလီၤပၥ်လီၤဃၥ်အသးအပူၤတသ့ဘၣ်.
တၢ်ဟ့ၣ်ပလီၢ်အကါဒိၣ်တဖၣ်-
န့ၣ်တၢ်သူအီၤလၢဂ့ၢ်ဂီၢ်အူတဖၣ်အဂီၢ်ဖဲတၢ်လီၤပျံၤအပတီၢ်န့ၣ်အါထီၣ်မ့ၢ်လၢတၢ်အိၣ်သးတဖၣ်ဆီတလဲအသးအဃိလီၤ
မၤတဂုၤနပီးလီဒီးမၤသီၣ်တၢ်ကလုၢ်သီၣ်ဒိၣ်ဒိၣ်တခါလၢအယံၥ် ၁၀ စဲးကီးန့ၣ်လီၤ,သနၥ်က့ဒိးသန့ၤထီၣ်အသးလၢနပီးလီအတၢ်ဆီလီၤပၥ်လီၤဃၥ်အသးအဖီခိၣ်လီၤ
နပီးလီန့ၣ်မ့ၢ်အိၣ်လၢ ‘တၢ်ဘှ့ၣ်တၢ်ဘှီၣ်’မ့တမ့ၢ် ‘တဘၣ်မၤတံၥ်တၥ်ယၤတဂ့ၤ’ အတၢ်ဆီလီၤဃၥ် အပူၤန့ၣ်တၢ်က စီၣ်အံၤတဆှၢဃီၤအသးဘၣ်
တၢ်ကးတံၢ်ဃၥ်အီၤလၢနပီးလီအတၢ်ဆီလီၤပၥ်လီၤဃၥ်အသးအပူၤသ့လီၤ.
တၢ်နီၣ်သိလ့ၣ်ဒီးဒိးတၢ်အခါ
ဖဲနမ့ၢ်ဒိးန့ၢ်ဘၣ် AusAlert ဖဲနနီၣ်သိလ့ၣ်မ့တမ့ၢ် ဒိးတၢ်အခါန့ၣ်, ပၥ်သးဂၢၢ်ဂၢၢ်ဒီးတဘၣ်ထၢထီၣ်နလီတဲစိတဂ့ၤ, တၢ်မၤအံၤမ့ၢ်လၢအတဖိးသဲစးအဃိလီၤ. တၢ်ဟ့ၣ်ပလီၢ်တၢ်ကလုၢ်အံၤကအိၣ်ကတီၢ်အသးဖဲအသီ ၁၀ စဲးကီး၀ံၤအလီၢ်ခံလီၤ. ဖဲမ့ၢ်သ့န့ၣ်, ကွၢ်ဃုတၢ်လီၢ်လၢအပူၤဖျဲးဒီးဖိးသဲစးတခါဒီးပၥ်ကတီၢ်နသိလ့ၣ်ဒီးဖးဘၣ်တၢ်ကစီၣ်တက့ၢ်
တၢ်မၤစၢၤဖး၀ဲဒၣ် AusAlert
ဖဲနမ့ၢ်လိၣ်ဘၣ်တၢ်မၤစၢၤလၢတၢ်ကနၢ်ပၢၢ် AusAlert အတၢ်ကစီၣ်တခါန့ၣ်-
သံကွၢ်ဘၣ်ဟံၣ်ဖိဃီဖိ, တံၤသကိးမ့တမ့ၢ်ပှၤတဂၤလၢအနၢ်ပၢၢ်အဲကလံးလၢကဖးန့ၢ်နၤတက့ၢ်
သမံသမိးဘၣ်ဂ့ၢ်ဂီၢ်အူတၢ်ဆဲးကျိးလၢအဂၤအကျိၤအကွၥ်တဖၣ်,အဒိဒ်သိးလီၢ်က၀ီၤမ့တမ့ၢ်ထံကီၢ် TV မ့တမ့ၢ် ကွဲၤလ့လိၤ, အဲး(ဖ)မ့တမ့ၢ်ပှၥ်ယဲၤသန့တဖၣ်တက့ၢ်
လဲၤကွၢ်ဘၣ် ausalert.gov.au/current-alerts လၢတၢ်ကဃုထံၣ်န့ၢ်တၢ်ဟ့ၣ်ပလီၢ်ဒီးကျိးထံအီၤဆူကျိၥ်လၢနဘၣ်သူၣ်ဘၣ်သးအီၤခီဖျိတၢ်သူအဲး(ဖ)မ့တမ့ၢ်ပှၥ်ယဲၤဘျးစဲတက့ၢ်.
ဖဲနမ့ၢ်လိၣ်ဘၣ်အါထီၣ်တၢ်မၤစၢၤလၢနကျိၥ်လၢအအါန့ၢ်ဒံးအဲကလံးကျိၥ်န့ၣ်, တၢ်တိစၢၤမၤစၢၤတဖၣ်လၢအအိၣ်လၢကဘျံးပၤတခါအံၤဒီးကျိၥ်အတၢ်နီၤဖးလၢပှၥ်ယဲၤအလိၤန့ၣ်ဘၣ်တဘၣ်ကမၤစၢၤတၢ်လီၤ.
အိၣ်ကတဲၥ်ကတီၤသးလၢ AusAlert အဂီၢ်
ဖဲ ယူၤဒီးယူၤလံ ၂၀၂၆ အကတီၢ်, AusAlert န့ၣ်ဘၣ်တၢ်မၤကွၢ်အီၤလၢအီးစတြ့လယါအပူၤလီၤ.
အခီပညီန့ၣ်မၤမ့တမ့ၢ်ပှၤတဂၤလၢနသ့ၣ်ညါကဒိးန့ၢ်ဘၣ် AusAlert တၢ်မၤကွၢ်အဂီၢ်လီၤ.
AusAlert တၢ်မၤကွၢ်တခါန့ၣ်တၢ်ကကွဲးလီၤဃၥ်လၢအဲကလံးအကျိၥ်အပူၤလီၤ. အကလီၤဂၥ်ဒီးတၢ်တခါအံၤလီၤ.
အဃိနကွၢ် AusAlert အတၢ်မၤကွၢ်အတၢ်ဟ့ၣ်ပလီၢ်စံး၀ဲတၢ်မနုၤလဲၣ်န့ၣ်လၢကညီအကျိၥ်,လၢပကျိးထံပၥ်လံအီၤလၢနဂီၢ်ဖဲအံၤသ့လီၤ.
| CRITICAL AUSALERT | AUSALERT လၢအကဲတၢ်သံတၢ်မူအတၢ်ဂ့ၢ် |
| TEST MESSAGE – AUSALERT | တၢ်မၤကွၢ်အတၢ်ကစီၣ်– AUSALERT |
| This is a TEST of AusAlert, Australia’s new emergency warning system. | တၢ်အံၤမ့ၢ်တၢ်မၤကွၢ် AusAlert, အီးစတြ့လယါဂ့ၢ်ဂီၢ်အူတၢ်ဟ့ၣ်ပလီၢ်အသီတခါလီၤ. |
| NO ACTION IS REQUIRED. | တၢ်တလိၣ်မၤတၢ်နီတမံၤဘၣ်. |
| In an actual emergency, follow the instructions in the alert to keep yourself and others safe. | လၢဂ့ၢ်ဂီၢ်အူတၢ်အိၣ်သးနီၢ်နီၢ်တခါအပူၤ,လူၤပိၥ်မၤထွဲတၢ်နဲၣ်လီၤတဖၣ်လၢတၢ်ဟ့ၣ်ပလီၢ်အပူၤလၢတၢ်ကပၥ်နကစၢ်အသးဒီးပှၤအဂၤပူၤပူၤဖျဲးဖျဲးတက့ၢ်. |
| Visit www.ausalert.gov.au for more information. | လဲၤကွၢ်ဘၣ် www.ausalert.gov.au လၢတၢ်ဂ့ၢ်တၢ်ကျိၤဆူညါအဂီၢ်တက့ၢ်. |
| This message is authorised by the Australian Government. | တၢ်ကစီၣ်တခါအံၤဘၣ်တၢ်ဟ့ၣ်စိဟ့ၣ်ကမီၤခီဖျိအီးစတြ့လယါအပဒိၣ်န့ၣ်လီၤ. |
AusAlert အကလုၢ်သီၣ်ဒ်အံၤလီၤ.
ဖဲ AusAlert တၢ်မၤကွၢ်အဆၢကတီၢ်န့ၣ်-
တၢ်ကစီၣ်တခါကအိၣ်ဖျါထီၣ်လၢလီအမဲၥ်သၣ်အလိၤ
နပီးလီန့ၣ်အကတရုၤအသး
ဘၣ်တဘၣ်နကနၣ်ဟူဘၣ်တၢ်ဟ့ၣ်ပလီၢ်အသီၣ်အဒိၣ်တခါလၢ ၁၀ စဲးကီးအတီၢ်ပူၤလီၤ
နတလိၣ်မၤတၢ်နီတမံၤဘၣ်
ထံကီၢ်ပတီၢ်တၢ်မၤကွၢ်
ထံကီၢ်ပတီၢ်တၢ်မၤကွၢ်လၢ AusAlert န့ၣ်ကမ့ၢ်၀ဲဒၣ်ဖဲ 27 ယူၤလံ 2026 န့ၣ်လီၤ. ဖဲတၢ်မၤကွၢ်အဆၢကတီၢ်,ပီးလီကိးခါဒဲးလၢအဘၣ်လိၥ်အသးကိးဖျၢၣ်ဒဲးလၢအီးစတြ့လယါအပူၤကဒိးန့ၢ်ဘၣ်တၢ်ဟ့ၣ်ပလီၢ်တခါအံၤလၢတၢ်ဆၢကတီၢ်တခါဃီအတီၢ်ပူၤလီၤ.
တၢ်အိၣ်ကတဲၥ်ကတီၤသးလၢတၢ်မၤကွၢ်အဂီၢ်
ဖဲဒိးန့ၢ်ဘၣ် AusAlert တၢ်မၤကွၢ်အတၢ်ကစီၣ်မ့ၢ်ကမၤတံၥ်တၥ်နၤမ့တမ့ၢ်ပှၤလၢနအဲၣ်တဂၤကတူၢ်ဘၣ်တၢ်တမုၥ် တလၤန့ၣ်, ၀ံသးစူၤကးတံၢ်နလီတဲစိအပီးလီတဖၣ်မ့တမ့ၢ်ပၥ်လီၤဃၥ်အ၀ဲသ့ၣ်လၢတၢ်ဒိးကဘီယူၤအတၢ်အိၣ်သးတချုးတၢ်မၤကွၢ်အဆၢကတီၢ်လၢနလီၢ်က၀ီၤအပူၤဒီးပၥ်တ့ၢ်အီၤဒ်န့ၣ်လၢအစှၤကတၢၢ်တနၣ်ရံၣ်အဂီၢ်တက့ၢ်.